Ung kona segist hafa orðið fyrir mikilli niðurlægingu eftir að starfsmaður matvöruverslunar neitaði að leyfa henni að kaupa áfengi sökum þess að handleggir hennar eru þaktir örum eftir sjálfskaða. Segir hún augljóst að þörf er á fræðslu fyrir almenning um þessi mál og eyða þurfi fordómum.

Hin 21 árs gamla Becci Wain sem kemur frá smábænum Fulbourn nálægt Cambridge á Englandi segist hafa ætlað að kaupa kampavínsflösku fyrir afmæli vinar síns og sýnt kassastarfsmanni verslunarkeðjunnar skilríki sín. Segir hún að starfsmaðurinn hafi þá litið á handleggi hennar og sagt: „Ertu viss um að þú megir kaupa þetta með öll þessi ör á höndunum á þér?“

„Hún sagði því næst að hún gæti ekki selt mér þessa vöru. Það voru þrír viðskiptavinir í röð á eftir mér og þetta var ótrúlega niðurlægjandi,“ segir Becci jafnframt og lýsir því næst viðbrögðum verslunarstjórans sem hún krafðist að fá að tala við. „Hann sagði að samkvæmt stefnu verslunarinnar væri þeim óheimilt að selja mér áfengi út af örunum mínum,“ segir hún og furðar sig á viðbrögðunum ekki síst vegna þess að það hafi verið augljóst að um gjöf var að ræða þar sem að hún var einnig að kaupa poka fyrir flöskuna og afmæliskort.

Hún segist löngu vera hætt öllum sjálfskaða; örin á höndum hennar séu orðin hálfs árs gömul og að hún sæki reglulega meðferð hjá sálfræðingi. „Ég er á góðum stað núna en það er ógeðslegt að verða vitni að því að einhver haldi að örin mín séu tilkomin vegna þess að ég sé hættuleg sjálfri mér og öðrum,“ segir hún og bendir á einstaklingar sem bera ör vegna sjálfskaða séu margir á mjög viðkvæmum stað og það viðhorf sem mætti henni í matvörubúðinni sé síst til þess fallið að hjálpa. Það geti jafnvel leitt til þess að sumir þessara einstaklinga sæki ennþá meir í það að skaða sig.

Hún segir augljóst að þörf sé á fræðslu og þjálfun fyrir starfsfólk verslana hvað þetta varðar. „Ég hef aldrei reynt að fela örin mín, enda á ég ekki að þurfa þess.“