Haraldur Ingi Þorleifsson frumkvöðull og tæknifrömuður greinir frá því í nýrri færslu á samfélagsmiðlinum X, sem áður hét Twitter, að hann hafi upplifað ótrúlega atburðarás þegar hann starfaði hjá fyrirtækinu. Greinir hann frá því að það hafi gengið ótrúlega hægt og illa að bæta við möguleika fyrir notendur sem hafi í raun verið einfaldur í hönnun og vinnslu. Segist Haraldur aldrei hafa upplifað annað eins á sínum ferli og Twitter hafi verið verst rekna fyrirtæki sem hann hafi kynnst.
Haraldur seldi Twitter fyrirtæki sitt en var eftir það um tíma starfsmaður þar en lét af störfum fljótlega eftir að auðjöfurinn umdeildi Elon Musk keypti fyrirtækið árið 2023 . Áttu Haraldur og Musk í orðaskaki á Twitter fyrir opnum tjöldum sem vakti heimsathygli. Musk hæddist meðal annars að fötlun Haraldar en sá að lokum að sér og baðst afsökunar:
Musk biður Harald afsökunar – Segir hann íhuga að snúa aftur til starfa hjá Twitter
Haraldur tekur þó sérstaklega fram í hinni nýju færslu að atburðarásin sem hann lýsir hafi átt sér stað áður en Musk tók Twitter yfir.
Í færslunni segir Haraldur frá því að tveimur vikum eftir að hann gerðist starfsmaður Twitter hafi hann verið beðinn að setja saman hóp til að bæta við svokölluðum edit-hnappi á samfélagsmiðilinn, væntanlega var þetta hugsað til þess auðvelda notendum að breyta færslum sínum.
Haraldur segir að áður hafi margir notendur eindregið óskað eftir þessum hnappi. Það hafi tekið um einn dag að hanna hnappinn en síðan hafi löng þrautaganga við að koma honum í gagnið hafist:
„Twitter var ekki gert til að búa til hluti. Stundum leið mér eins og hver sem er hjá fyrirtækinu gæti sagt nei við hugmynd og þar með yrði ekkert úr henni.“
Haraldur segir að næsta skref hafi verið að fá mat á því hversu lengi tæknivinnan á bak við það að koma hnappnum í gagnið myndi taka. Það eitt hafi tekið heila fjóra mánuði:
„Fjórir mánuðir af því að í raun grátbiðja fólk um að segja okkur hvað myndi taka langan tíma að búa þetta til.“
Eftir fjóra mánuði hafi loks fengist það svar frá verkfræðingum Twitter að það myndi taka 18 mánuði að koma edit-hnappnum í gagnið. Haraldur segir það hreinlega ótrúlegt miðað við um hversu einfalt verk hafi verið að ræða:
„18 mánuði til að búa til einfalda tæknilausn.“
Með miklu baktjaldamakki hafi tekist að skera þennan tíma niður í átta mánuði en árangurinn hafi ekki verið góður:
„Lausnin var mjög gölluð og takmörkuð.“
Þegar edit-hnappurinn var loksins tekinn í gagnið höfðu þeir stjórnendur sem báðu Harald að taka verkefnið að sér báðir verið reknir. Arftaki annars þeirra hafi síðan afhjúpað nýja hnappinn opinberlega og ekkert minnst á þá vinnu sem Haraldur og hópurinn sem hann setti saman lögðu í verkið. Haraldur segist þá hafa farið fram á það að minnst yrði að minnsta kosti á framlag hönnuðar sem hefði verið hluti af verkefninu frá upphafi. Fyrir þessa beiðni uppskar Haraldur hins vegar aðeins reiðilegt símtal.
Eins og áður segir gerðist þetta allt áður en Elon Musk tók Twitter yfir en um þessa reynslu sína segir Haraldur að lokum:
„Ég hef aldrei kynnst fyrirtæki sem hefur verið jafn illa stjórnað og Twitter.“
About 2 weeks after I joined Twitter as an employee I was asked to put together a team to create the edit button.
It had been the most requested feature on the platform for a long time.
The design process was simple. I think we did that in about a day.
But then the hard work…
— Halli (@iamharaldur) August 13, 2025
