Framtíð hins eftirsótta Viktor Gyokeres er áfram í lausu lofti. Það eina sem virðist á hreinu er að hann mun yfirgefa portúgalska félagið Sporting.

Þessi 27 ára gamli framherji hefur einna helst verið orðaður við Arsenal og Manchester United, en er hann sagður hafa útilokað að fara til síðarnefnda félagsins. Spilar þar inn í að liðið hafnaði í 15. sæti ensku úrvalsdeildarinnar í vor og engin Evrópukeppni í boði.

Portúgalskir miðlar segja nú að Arsenal hafi lagt fram tilboð í Gyokeres í síðustu vikunni en var það nokkuð frá því sem Sporting vill. Eru Skytturnar hikandi við að ganga að verðmiðanum. Talið er að Arsenal hafi boðið upphæð sem gæti orðið allt að 55 milljónir punda. Sporting vill hins vegar tæpar 70 milljónir punda.

Hugsanleg skipti Svíans til Arsenal eru því sögð í uppnámi sem stendur. Sagt er að enska félagið muni nú aftur skoða það að reyna við Benjamin Sesko hjá RB Leipzig eða Ollie Watkins hjá Aston Villa.

Mikið hefur verið fjallað um að Gyokeres sé ósáttur við þann háa verðmiða sem Sporting hefur sett á hann. Taldi hann sig hafa heiðursmannasamkomulag um að hann mætti fara fyrir minna.