Landsliðsfyrirliðinn Glódís Perla Viggósdóttir er í toppstandi þegar tæpar þrjár vikur eru í að EM í Sviss hefjist.

Þorsteinn Halldórsson sagði frá þessu í samtali við 433.is í dag. Glódís spilaði síðustu tvo leiki Þjóðadeildarinnar gegn Frökkum og Norðmönnum, en hún hefur samt sem áður glímt við meiðsli í vor. Þau ættu ekki að plaga hana á EM.

„Hún er alveg klár. Hún fór í gegnum þessa leiki þannig séð auðveldlega. Hún lítur bara vel út,“ sagði Þorsteinn um fyrirliðann, sem er auðvitað lykilmaður Bayern Munchen einnig.

„Nú líður smá tími milli þess sem hún spilar leiki en hún er að æfa og verður í toppstandi á EM,“ sagði hann enn fremur.

Ísland hefur leik á EM 2. júlí gegn Finnum. Við tekur leikur gegn heimakonum í Sviss 6. júní áður en Stelpurnar okkar mæta Noregi í lokaleik riðilsins þann 10. júlí. Tvö efstu liðin fara áfram í 8-liða úrslit.