Þorsteinn Halldórsson, þjálfari kvennalandsliðsins, opinberaði í dag hóp sinn fyrir lokamót EM í Sviss í sumar. 433.is ræddi við hann um hópinn og mótið.

„Það er sem betur fer erfitt að velja hóp. Það væri ekki sérlega spennandi ef það væri auðvelt. Maður þarf að hugsa alla þætti, hvað hver getur gefið þér. Ég tel að þetta sé hópurinn sem muni fleyta okkur áfram upp úr þessum riðli,“ sagði Þorsteinn.

Meira
Þetta er EM hópur kvenna sem fer á stórmótið – Sex spila í Bestu deild kvenna

Ísland er í riðli með heimakonum í Sviss, Noregi og Finnlandi á EM. Stelpurnar okkar ríða á vaðið 2. júlí gegn síðastnefnda liðinu. Okkar lið er það hæst skrifaðasta af þessum liðum samkvæmt heimslista FIFA og var Þorsteinn spurður að því hvort krafa væri að fara upp úr riðlinum.

„Það er alltaf spurning hvernig við lesum í það orð. Við gerum þá kröfu á okkur sjálf að fara upp úr riðlinum. Fólk getur alveg krafist þess að við förum upp úr riðlinum en við gerum þá kröfu sjálf að fara upp úr riðlinum. Þetta er það sem við ætlum okkur og munum gera. Við treystum á góða leiki og góðar frammistöður. Ef það gengur eftir náum við okkar markmiðum.“

Eins og töluvert hefur verið rætt og ritað um hefur íslenska liðið ekki unnið í tíu leikjum í röð. Þorsteinn hefur ekki áhyggjur af því.

„Það verður bara gaman þegar sigurinn kemur á EM,“ sagði hann léttur.

Ítarlegt viðtal er í spilaranum.