Auðkýfingurinn Elon Musk var harðlega gagnrýndur fyrir meinta nasistakveðju í ræðu sem hann fór með í kjölfar innsetningarathafnar Donald Trump Bandaríkjaforseta þann 20. janúar. Musk virtist ekki gefa mikið fyrir gagnrýnina og sló á létta strengi á samfélagsmiðlum í kjölfarið. Nú er komið á daginn að honum sárnaði töluvert en hann telur sig fórnarlamb linnulausrar áróðursherferðar sem sé ætlað að hafa af honum mannorðið.
Musk mætti í viðtal til tengdadóttur forsetans, Lara Trump, á Fox-fréttastofunni þar sem hann opnaði sig um það að hafa nú mánuðum saman verið uppnefndur nasisti á netinu.
„Ég meina þetta er linnulaus áróðursherferð sem Trump forseti hefur klárlega orðið fyrir barðinu á lengi, síðustu 20 árin og jafnvel lengur,“ sagði ríkasti maður heims. „Pólitíkin er blóðug íþrótt svo þar verður farið í allar mögulegar árásir sem geta rústað almenningsáliti einhvers.“
Musk segist aldrei hafa gert nokkrum neitt. Því sé sárt að vera uppnefndur með þessum hætti.
„Ég hef aldrei skaðað nokkurn mann svo það er galið að halda því fram að ég sé nasisti, því málið með nasista var ekki hvernig þeir báru sig eða hvernig þeir klæddu sig heldur það að þeir myrtu milljónir. Það er nefnilega málið. Þeir hafa líka kallað Trump forseta nasista og það var einn miðill sem sagði Trump verri en Hitler, Stalín og jafnvel Maó, allir samanlagt. En hann er ekki ofbeldisfull manneskja og hefur í reynd gert margt til að koma í veg fyrir stríð eða fyrirbyggja þau, sem er öfugt við það að vera nasisti.“
Auðkýfingurinn segir að meginstraumsfjölmiðlar hafi leikið stórt hlutverk í þessari áróðursherferð og segist jafnframt vera vonsvikinn yfir því hversu árangursríkur áróðurinn hefur verið.
„Ef þú endurtekur lygi, á borð við „hann er nasisti“-lygina, nægilega oft þá fara sumir að trúa henni, sérstaklega fólk sem trúir enn þessum rótgrónu miðlum.“
Musk segir að þessir miðlar muni svífast einskis til að ná höggi á honum.
„Þeir reyna að finna allar leiðir til að ná höggi á mér. Ef þeir gætu ýtt á takka til að drepa mig, þá myndu þeir gera það umhugsunarlaust. En þar sem það er frekar erfitt að drepa mig hafa þeir ákveðið að fremja mannorðsmorð í staðinn.“
