Alcatraz-fangelsið er heimsþekkt fangelsi á samnefndri eyju úti fyrir San Francisco. Fangelsi var opnað þar árið 1934 en því var lokað árið 1963. Sterkir straumar og kaldur sjór umhverfis eyjuna áttu að gera það næstum ómögulegt að flýja af eyjunni.
Alcatraz er í dag vinsæll ferðamannastaður þar sem fólki gefst kostur á að skoða meðal annars þær aðstæður sem föngum var boðið upp á á eyjunni.
Í færslu á samfélagsmiðli sínum, Truth Social, beindi Trump þeim tilmælum til opinberra stofnanna, þar á meðal dómsmálaráðuneytisins og FBI, að hefja vinnu við að opna fangelsið á nýjan leik.
„Í of langan tíma hafa Bandaríkin verið plöguð af grimmilegum og ofbeldisfullum síbrotamönnum – úrhrökum samfélagsins – sem munu aldrei leggja neitt annað til en eymd og þjáningu,“ sagði hann og bætti við að áður fyrr hefðu Bandaríkin ekki hikað við að hýsa hættulegustu glæpamennina langt frá mannabyggðum.
Óvíst er hvort og þá hvernig Trump hyggst endurvekja fangelsisstarfsemi á eyjunni á nýjan leik, en í umfjöllun bandarískra fjölmiðla er bent á að fangelsinu hafi verið lokað á sínum tíma vegna þess mikla kostnaðar sem fylgdi því að reka það.
