Manchester United hefur staðfest að Michael Carrick verði áfram knattspyrnustjóri félagsins eftir að hafa skrifað undir nýjan samning sem gildir til ársins 2028.

Carrick tók við liðinu í janúar og hefur náð frábærum árangri á stuttum tíma. United tryggði sér sæti í Meistaradeild Evrópu á næsta tímabili undir hans stjórn og vann 11 af fyrstu 16 leikjum sínum í ensku úrvalsdeildinni.

Fyrrum miðjumaðurinn fékk einnig verðlaunin sem stjóri mánaðarins eftir sigra gegn bæði Manchester City og Arsenal í fyrstu leikjum sínum við stjórnvölinn.

Carrick er einn sigursælasti leikmaður í sögu Manchester United en hann lék 464 leiki fyrir félagið og vann meðal annars fimm Englandsmeistaratitla, Meistaradeild Evrópu og Evrópudeildina.

„Frá fyrsta degi fyrir 20 árum fann ég fyrir töfrunum í Manchester United,“ sagði Carrick eftir undirritunina.

„Það fyllir mig stolti að leiða þetta sérstaka félag. Nú þurfum við að halda áfram saman með skýran metnað og markmið.“

Jason Wilcox, yfirmaður knattspyrnumála hjá United, sagði að Carrick hefði sannarlega unnið sér inn tækifærið. „Við höfum ekki aðeins séð góð úrslit heldur einnig nálgun sem passar fullkomlega við gildi og sögu félagsins,“ sagði Wilcox.

Stuðningsmenn United hafa tekið vel í ráðninguna enda hefur liðið sýnt miklar framfarir síðan Carrick tók við stjórnartaumunum.