Óvissa ríkir um framtíð Arne Slot hjá Liverpool þrátt fyrir að Hollendingurinn hafi stýrt félaginu til Englandsmeistaratitils á sínu fyrsta tímabili.

Samkvæmt enskum götublöðum hefur Liverpool þegar haft samband við Jurgen Klopp á meðan stjórnendur félagsins meta stöðu Slot eftir vonbrigðatímabil á lokasprettinum.

Liverpool vann deildina á síðasta tímabili en hefur átt erfitt uppdráttar á þessu ári þrátt fyrir stórfelld leikmannakaup síðasta sumar. Tap gegn Aston Villa í næstsíðustu umferðinni setti Meistaradeildarsætið í hættu og Bournemouth andar nú ofan í hálsmálið á liðinu fyrir lokaumferðina.

SunSport greinir frá því að Liverpool hafi haft samband við Klopp, þó óljóst sé hvort það sé til að leita ráða hjá fyrrum stjóranum eða kanna áhuga hans á ótrúlegri endurkomu.

Jurgen Klopp yfirgaf Liverpool árið 2024 eftir níu ára afar farsælt tímabil þar sem hann vann meðal annars ensku úrvalsdeildina og Meistaradeild Evrópu. Þjóðverjinn er enn í miklu uppáhaldi hjá stuðningsmönnum félagsins.

Þá hefur verið greint frá því að eigandi Liverpool, John Henry, hafi flogið til Palma de Mallorca þar sem Klopp býr nú.

Ef Liverpool ákveður að skipta um stjóra er Andoni Iraola, stjóri Bournemouth, sagður vera efstur á óskalistanum hjá félaginu.

Næstu dagar gætu því orðið afar örlagaríkir á Anfield.