Kristján Gylfi Guðmundsson, blaðamaður á Morgunblaðinu, vonar að ÍTF og KSÍ endurskoði þá ákvörðun sína að spila marga leiki í Bestu deild karla á sama tíma.

Um þetta hefur verið nokkuð rætt en fleiri leikir fara nú fram á sama tíma en á síðustu árum. Sem dæmi fara fimm leikir fram annað kvöld.

Með þessu getur rétthafinn, Sýn, verið með þætti í kringum beinar útsendingar þar sem sýnt er frá öllum völlum á sama tíma.

,Nokkur breyting hefur verið á því hvernig leikjum deildarinnar hefur verið raðað upp. Ljóst er að vinsældir sjónvarpsþátta Sýnar í vetur, þar sem fylgst er með mörgum fótboltaleikjum samtímis og skipt milli valla, eins og tíðkaðist í útvarpslýsingum Rásar tvö á sokkabandsárum höfundar, virðast hafa vegið þungt í þessari stefnubreytingu. Er þessi breyting afar umdeild meðal áhangenda deildarinnar,“ skrifar Kristján í Morgunblaðið í dag.

Kristján segir að fíklar í fótbolta líði fyrir þetta. „Til að mynda annað kvöld eru fimm leikir í belg og biðu og svo einn stakur leikur á sunnudegi. Höfundi sem og öðrum fótboltafíklum sem vilja mæta á völlinn og sjá fleiri leiki beint í sjónvarpi er því gert erfiðara um vik að fylgjast vel með og taka þátt í stemningunni.“

Kristján skorar á fólk að endurskoða þetta. „Höfundur skorar hér með á ÍTF og KSÍ að endurskoða þetta fyrirkomulag og dreifa leikjunum aftur á fleiri daga eins og áður var til hagsbóta fyrir aðdáendur Bestu deildarinnar,“ skrifar Kristján að endingu í Morgunblaðið.