Gabriel Jesus gæti verið á leið frá Arsenal í sumar og útilokar ekki að snúa aftur til Brasilíu.

Sóknarmaðurinn, sem er 29 ára, hefur átt erfitt uppdráttar á tímabilinu og aðeins byrjað átta leiki. Meiðsli í hné hafa einnig haft áhrif og talið er að Arsenal sé tilbúið að selja hann þegar félagaskiptaglugginn opnar.

Jesus á eitt ár eftir af samningi sínum í sumar og hefur sjálfur viðurkennt að hann hafi sterka löngun til að snúa aftur til Palmeiras, uppeldisfélags síns.

„Samband mitt við Palmeiras hefur alltaf verið gott. Mig langar einn daginn að snúa aftur og vinna fleiri titla,“ sagði hann.

Þrátt fyrir það leggur hann áherslu á að fókus hans sé enn hjá Arsenal. „Ég vil hjálpa liðinu eins og ég get og svo sjáum við hvað gerist eftir tímabilið,“ bætti hann við.

Einnig hefur verið orðrómur um áhuga frá félögum á Ítalíu, þar á meðal AC Milan og Juventus.

Framtíð Jesus virðist því opin með nokkra valkosti í boði.