ÍA tilkynnti í gær að Jón Þór Hauksson myndi láta af störfum sem þjálfari karlaliðsins eftir dapurt gengi í Bestu deildinni. Þetta var til umræðu í Innkastinu á Fótbolta.net og þar voru menn nokkuð vissir um hver tæki við.

ÍA er á botni deildarinnar með 9 stig eftir 11 leiki og Jón Þór því látinn fara. Væntingarnar til liðsins í ár voru miklar í kjölfar þess að liðið hafði verið í Evrópubaráttu á síðustu leiktíð sem nýliðar undir hans stjórn.

Nokkur nöfn hafa verið nefnd til sögunnar sem gætu tekið við af Jóni Þór. Má þar til að mynda nefna Jóhannes Karl Guðjónsson, fyrrum þjálfara ÍA og aðstoðarþjálfara íslenska karlalandsliðsins. Jóhannes er Skagamaður en þjálfar í dag AB Kaupmannahöfn í dönsku C-deildinni.

Í Innkastinu var bent á að stuðullinn á að Jóhannes tæki við væri orðinn ansi lágur, mun lægri en á næsta mann, Gunnar Heiðar Þorvaldsson, sem hefur gert flotta hluti með Njarðvík í Lengjudeildinni.

„Hættum öllum barnaleikjum. Við þekkjum veðmálasíður og ef stuðullinn er svona lágur, þá er eitthvað að gerast. Það er nánast staðfest,“ sagði Benedikt Bóas Hinriksson.

Sæbjörn Steinke tók undir. „Tímabilið er búið í Danmörku hjá Jóa Kalla. Hann er ekki heimskur, hann veit alveg hvernig staðan er uppi á Skaga. Hann gæti alveg hafa látið vin sinn látið vin sinn vita að hann væri klár ef þeir væru að pæla í að skipta. Ég hef heyrt að það kosti 2 milljónir að fá hann lausan frá AB.“