Jón Þór Hauksson og ÍA hafa komist að samkomulagi um að hann hætti sem þjálfari karlaliðsins eftir dapurt gengi í Bestu deildinni það sem af er sumri. Félagið staðfestir þetta.

Skagamenn eru á botni deildarinnar með aðeins 9 stig eftir 11 leiki, sem er langt frá markmiðum eftir flott tímabil í fyrra. Í viðtölum eftir tap gegn Afturelding í gær viðurkenndi Jón Þór að hann óttaðist um stöðu sína við stjórnvölinn.

Í tilkynningu ÍA er ákvörðunin sögð sameiginleg. „Ég vil þakka Knattspyrnufélagi ÍA fyrir samstarfið síðustu ár. Það hefur verið mér bæði lærdómsríkt og ánægjulegt að starfa með leikmönnum og starfsfólki félagsins. Ég óska liðinu og öllum sem að því koma góðs gengis í framtíðinni,“ segir Jón Þór.

Jón Þór var á sínu fjórða tímabili með ÍA. Kom hann liðinu upp úr Lengjudeildinni á þarsíðustu leiktíð og fylgdi því eftir með 5. sætinu í efstu deild í fyrra.

ÍA er nú farið í leit að nýjum þjálfara til að takast á við seinni hluta tímabilsins og reyna að snúa genginu við.

Tilkynning ÍA
Knattspyrnufélag ÍA tilkynnir að Jón Þór Hauksson hefur látið af störfum sem þjálfari meistaraflokks karla. Ákvörðunin var tekin í samráði milli Jóns Þórs og stjórnar félagsins.

Jón Þór tók við þjálfun liðsins þann 1. febrúar 2022 og hefur gegnt starfinu af ábyrgð og festu á þeim tíma sem hann hefur verið hjá félaginu. Bæði hann og stjórn félagsins voru sammála um að nú væri rétt að gera breytingar, með hagsmuni liðsins og framtíðaruppbyggingu að leiðarljósi.

„Ég vil þakka Knattspyrnufélagi ÍA fyrir samstarfið síðustu ár. Það hefur verið mér bæði lærdómsríkt og ánægjulegt að starfa með leikmönnum og starfsfólki félagsins. Ég óska liðinu og öllum sem að því koma góðs gengis í framtíðinni.“ Jón Þór Hauksson

Stjórn KFÍA þakkar Jóni Þór fyrir samstarfið og óskar honum velfarnaðar í næstu verkefnum.

Stjórnin hefur hafið undirbúning að ráðningu nýs þjálfara og verður tilkynnt um framhaldið þegar það liggur fyrir.

F.h. stjórnar Knattspyrnufélags ÍA
Eggert Herbertsson, formaður