Ange Postecoglou skoðar þann möguleika alvarlega að fara og starfa í Sádi-Arabíu samkvæmt enskum miðlum.

Ástralinn var rekinn úr stjórastórlnum hjá Tottenham á dögunum, þrátt fyrir að hafa bundið enda á 17 ára titlaþurrk með sigri í Evrópudeildinni. Stjórnin var ekki til í að horfa framhjá því að liðið hafnaði í 17. sæti ensku úrvalsdeildarinnar.

Thomas Frank tók við af honum og nú horfir Postecoglou því í kringum sig. Talið er að áhugi sé á honum á Englandi og annars staðar í Evrópu, en helst vill hann fá að spreyta sig áfram í ensku úrvalsdeildinni.

Sádiarabíska félagið Al-Ahli, sem vann Meistaradeild Asíu á dögunum, er hins vegar með augastað á Postecoglou. Stjórinn þar, Matthias Jaissle, gæti verið á förum og mun félagið þá líklega setja sig í samband við Postecoglou.

Hann er opinn fyrir því að skoða það, en ljóst er að hann myndi þéna ansi vel í Sádí. Þá er Al-Ahli með menn eins og Ivan Toney, Riyad Mahrez og Bobby Firmino innanborðs.