Ásgeir Frank Ásgeirsson aðstoðarþjálfari Fjölnis segir það af og frá að hann sé hættur störfum, slík saga hefur gengið manna á millum.

433.is fékk nokkrar ábendingar fyrir Helgi að búið væri að láta Ásgeir fara og frá þessu var svo sagt í Þungavigtinni í dag.

„Orðrómur um að hann hafi verið látin fara,“ sagði Ríkharð Óskar Guðnason stjórnandi Þungavigtarinnar.

Gunnar Már Guðmundsson tók við þjálfun Fjölnis í febrúar þegar Úlfur Arnar Jökulsson var rekinn en Úlfur réð Ásgeir til starfa. „Sögur um að hann hafi verið að grafa undan þjálfaranum, þetta er orðrómur. Fjölnir er í alvöru brekku,“ sagði Kristján Óli Sigurðsson sérfræðingur Þungavigtarinnar.

Í samtali við 433.is sagði Ásgeir þetta vera af og frá, hann hafi verið veikur undanfarið og því ekki verið með í leiknum gegn HK. Hann segist ekki átta sig á því hvernig svona sögusagnir fara af stað.

Fjölnir er á botni Lengjudeildarinnar með þrjú stig en liðið hefur verið að flakka á milli efstu og næst efstu deildar síðustu ár.