Aron Jóhannsson, leikmaður Vals, var gestur í nýjasta þætti Íþróttavikunnar á 433.is. Helgi Fannar Sigurðsson og Hrafnkell Freyr Ágústsson hafa umsjón með þættinum.

Gylfi Þór Sigurðsson, besti landsliðsmaður Íslandssögunnar, er liðsfélagi Arons hjá Val. Gylfi kom heim úr atvinnumennsku og gekk í raðir félagsins í fyrra.

„Maður fann alveg að þegar hann kom þá kom mikil innspýting. Valur hefur aldrei selt fleiri árskort og það kom mikil spenna. Það kom stundum fyrir að krakkar voru mættir á glerið á æfingum og vildu hlaupa inn á,“ sagði Aron um komu Gylfa.

„Jafnframt kemur líka auka pressa. Það er alveg erfitt að koma til Íslands, eins og fyrir Gylfa. Þó ég sé með honum í liði get ég sagt að hann er að spila með lélegri leikmönnum en hann er vanur. Úti er hann í bestu deildinni með bestu leikmönnunum. Hann er kannski að fá boltann í lappir 2 sekúndum fyrr. Við erum kannski ekki eins góðir að koma boltanum eins fljótt á hann og hann kominn með varnarmann í bakið.“

Gylfi átti flott tímabil og skoraði 11 mörk á sinni fyrstu leiktíð í Bestu deildinni.

„Það er líka erfitt að koma heim og allir halda að þú skorir sex mörk í leik. Þetta er allt öðruvísi fótbolti en fólk gerir sér grein fyrir. Við í Val vorum held ég að hlaupa meira en Werder Bremen í þýsku úrvalsdeildinni. Það er bara af því við erum ekki eins klókir og þeir.“

Umræðan í heild er í spilaranum.