Roy Keane hefur tjáð sig um atvik sem fáir vissu af en hann lenti eitt sinn í slagsmálum við liðsfélaga sinn Peter Schmeichel hjá Manchester United.

Keane og Schmeichel léku lengi vel saman hjá United og eru tvær goðsagnir félagsins en hafa báðir lagt skóna á hilluna.

Gary Neville, annar fyrrum leikmaður United, minnti Keane á slagsmál sem áttu sér stað í Singapore á sínum tíma í æfingaferð.

Keane og Schmeichel náðu ekki alltaf vel saman og eitt sinn fóru þeir báðir yfir strikið og slógust harkalega þar sem ekkert var gefið eftir.

,,Já, hann byrjaði þetta. Ég var að verja sjálfan mig en já þetta voru alvöru slagsmál,“ sagði Keane við Neville.

,,Augljóslega vorum við að fá okkur í glas og vorum nýkomnir úr flugi en Peter endaði kvöldið með glóðarauga. Við æfðum bara venjulega daginn eftir.“

,,Peter tók þessu vel, stundum lendirðu í slagsmálum við liðsfélagana. Það var hiti á milli mín og Peter í mörg ár og það var mikil spenna okkar á milli.“