Age Hareide landsliðsþjálfari var að vonum vonsvikinn með jafntefli gegn Lúxemborg í undankeppni EM 2024 í kvöld.

Ísland leiddi 1-0 eftir frábæran fyrri hálfleik en sá seinni var langt frá því að vera nógu góður og urðu lokatölur 1-1.

„Ég er mjög ánægður með fyrri hálfleikinn. En þetta var líkt leiknum gegn Slóvakíu. Við fengum mikið af færum og nýttum þau ekki. Við þurfum að halda áfram að leggja hart að okkur. Fyrri hálfleikur var mjög góður og það komu upp margir góðir sénsar,“ sagði Hareide við Stöð 2 Sport eftir leik.

Gylfi Þór Sigurðsson sneri aftur í sínum fyrsta landsleik síðan í nóvember 2020. Hareie er ánægður með kappann og segir að liðið stóli á hann í mars þegar Ísland fer væntanlega í umspil Þjóðadeildarinnar.

„Ég er ánægður með áhrifin sem hann hefur haft. Hann hefur ekki spilað mikið en hefur allt sem þarf til að vera mikilvægur í mars. Þess vegna er hann hér, við þurfum að koma honum inn í það sem við erum að gera. Vonandi heldur hann áfram að spila með Lyngby og verður þá klár.“

Ísland mætir Liechtenstein í næsta leik og má búast við breytingum á liðinu að sögn Hareide.

„Það verða nokkrar breytingar. Við þurfum að hugsa um leikmennina þegar það er svo stutt á milli leikja.“