Zlatan Ibrahimovic vill sjá Kylian Mbappe yfirgefa PSG og fara til spænsku risanna Real Madrid. Framtíð Mbappe er í óvissu en samningur hans við PSG rennur út í sumar en flestir telja að hann muni þá semja við Real Madrid á frjálsri sölu.
Zlatan hvetur Mbappe eindregið til þess að yfirgefa heimalandið og semja við Real Madrid og upplifi fleiri ævintýri.
„Ég myndi fara en ef ég væri í stjórn PSG myndi ég að sjálfsögðu reyna að halda honum,“ sagði Zlatan á dögunum.
„Ég fékk tækifæri til þess að spila í ólíkum liðum og fullt af löndum og þannig lærði ég og varð betri. Það er miklu auðveldara að spila í heimalandinu allan ferilinn að mínu mati. En ef þú pakkar í töskur og ferð annað þá er það ævintýri.“
Mbappe leitaði ráða hjá Zlatan um hver hans næstu skref á ferlinum ættu að vera.
„Hann spurði mig hvað ég myndi gera í hans sporum og ég sagði að ég myndi fara til Real.“
