Landsliðsmaðurinn fyrrverandi, Rúrik Gíslason komst í krappan dans um helgina þegar hann skellti sér á tískuviku í Mílanó á Ítalíu. Þegar Rúrik var á röltinu um miðja nótt réðst að honum maður.

Rúrik hafði á hönd sinni nokkuð veglegt og dýrt úr sem maðurinn vildi fá. Rúrik þakkar því að hafa verið duglegur í ræktinni síðustu vikur.

„Það er gott að vera mættur aftur í ræktina eftir góða daga í Mílanó. Ég er mjög glaður með það að hafa verið duglegur í ræktinni undanfarið,“ sagði Rúrik í færslu á Instagram í gær.

Rúrik segir svo frá því hvernig vopnaði maðurinn réðst að honum. „Um miðja nótt í Mílanó þegar ég var að ganga heim af pöbbnum, þá vildi einstaklingur ræna af mér úrinu. Hann var vopnaður flösku sem var brotin.“

Rúrik náði að koma sér frá þessum aðstæðum. „Hann krafðist þess að fá úrið og reyndi að ráðast á mig en ég náði að sjá um það. Farið í ræktina strákar.“

Rúrik hætti í fótbolta fyrir tveimur árum en hefur svo sannarlega slegið í gegn utan vallar bæði í Þýskalandi og hér á landi.