Leicester tók á móti Newcastle í kvöld í fyrsta leik helgarinnar í ensku úrvalsdeildinni. Heimamenn töpuðu óvænt 2-4 í kvöld.
Joe Willock kom Newcastle yfir á 22. mínútu er hann nýtti sér mistök Caglar Soyuncu í vörn Leicester. Rúmum tíu mínútum síðar skoraði Paul Dummett annað mark gestanna með skalla eftir frábæra sendingu Matt Ritchie. Newcastle leiddi með þessum mörkum í hálfleik.
Callum Wilson fór langleiðina með að gera út um leikinn með marki þegar klukkutími var liðinn af honum. Hann var svo aftur á ferðinni á 73. mínútu. Hann slapp þá í gegn, átti skot í stöng en fylgdi eftir og skoraði. Staðan orðin 4-0 fyrir gestina!
Heimamenn klóruðu í bakkann með tveimur mörkum. Marc Albrighton skoraði það fyrra með góðu skoti úr teignum. Kelechi Iheanacho gerði seinna mark Leicester eftir undirbúning Ayoze Perez.
Eftir tapið er Leicester með 63 stig í þriðja sæti. Þeir hafa 2 stigum meira en Chelsea og 5 stigum meira en West Ham. Síðarnefndu liðin eiga þó bæði leik til góða. Þá á Leicester ansi snúna leikjadagskrá í lokaleikjunum. Þeir eiga eftir að mæta Manchester United, Chelsea og Tottenham.
Newcastle er í þægilegum málum. Þeir eru í þrettánda sæti með 39 stig, 12 stigum fyrir ofan fallsvæðið.
