Arsenal tók í dag á móti Fulham í 32. umferð ensku úrvalsdeildarinnar á Emirates. Það leit út fyrir að Fulham myndi fara heim með þrjú stig en Arsenal jafnaði í uppbótartíma og leikurinn endaði því með 1-1 jafntefli liðanna.
Undir lok fyrri hálfleiks kom Dani Ceballos knettinum í netið með skalla en VAR ákvað að dæma markið af þar sem Saka virtist vera rangstæður í uppbyggingu marksins. Dómurinn var afar tæpur og eru stuðningsmenn Arsenal brjálaðir.
🤬🤬🤬🤬🤬
I loathe VAR with a venomous rage bordering on murderous. pic.twitter.com/Jj0gqXteIz— Piers Morgan (@piersmorgan) April 18, 2021
Eftir tæplega klukkutíma leik dæmdi Craig Pawson vítaspyrnu Fulham í vil og eftir nokkuð langa umhugsun staðfesti VAR dóminn. Maja fór á punktinn og kláraði örugglega og kom gestunum yfir. Arsenal sóttu stíft eftir markið og náðu loksins að jafna leikinn þegar sjö mínútur voru liðnar af uppbótartíma. Nketiah var hetjan sem skoraði af stuttu færi eftir hornspyrnu.
Markið var jafnframt þungt högg fyrir Fulham sem eru í harðri botnbaráttu í deildinni. Fulham eru í 18. sæti deildarinnar með 27 stig, 6 stigum á eftir Burnley sem eiga þó tvo leiki til góða. Arsenal er í 9. sæti deildarinnar með 46 stig.
Arsenal 1 – 1 Fulham
0-1 Maja (´59)
1-1 Nketiah (´90+8)
