Það fóru fram fjórir leikir í þýsku Bundesligunni í kvöld. Bayern vann sinn leik og er komið langleiðina með að vinna titilinn þar sem Leipzig tapaði á sama tíma. Alfreð Finnbogason kom inn á sem varamaður fyrir Augsburg í tapleik gegn Frankfurt. Hann klúðraði víti í leiknum.
Eric Maxim Choupo-Moting og Joshua Kimmich skoruðu mörk Bayern snemma leiks í 2-0 sigri gegn Leverkusen. Bayern er komið með 10 stiga forskot á toppi deildarinnar þar sem Leipzig, sem er í öðru sæti, tapaði gegn Köln á sama tíma, 2-1. Leverkusen er í 6.sæti og í baráttu um Evrópusæti. Köln eru í næstneðsta sæti, 2 stigum frá Mainz sem er í síðasta örugga sætinu. Þá á Mainz tvo leiki til góða á Köln.
Arminia Bielefeld komu sér 2 stigum frá fallsvæðinu með mikilvægum 1-0 sigri gegn Schalke. Þeir hafa þó leikið tveimur leikjum meira en Hertha, sem er í 16.sæti. Schalke eru langneðstir með 13 stig.
Frankfurt kom sér þá upp í þriðja sæti deildarinnar með sigri á Augsburg, 2-0. Alfreð kom inn á sem varamaður á 65.mínútu, þá var staðan orðin 2-0. Hann fékk tækifæri til að minnka muninn af vítapunktinum en brenndi af víti sínu. Augsburg eru um miðja deild en þurfa þó líklega nokkur stig í síðustu leikjum tímabilsins til að gulltryggja sæti sitt í deildinni.