Rio Ferdinand, fyrrverandi leikmaður Manchester United, segir að sitt gamla félag verði að kaupa framherjann Erling Braut Haaland, sama hvað það kostar. Ferdinand lét þessi orð falla í YouTube þætti sínum Vibe with five.
Haaland hefur slegið í gegn síðan að hann gekk til liðs við Dortmund frá RB Salzburg í janúar árið 2020.
Haaland hefur spilað 48 leiki fyrir Dortmund, skorað 47 mörk og gefið 11 stoðsendingar.
„Þeir bara verða að gera allt til þess að fá Haaland. Ég er ekki mikið fyrir það að tala um möguleg félagsskipti leikmanna en þessi maður! Við getum ekki leyft honum að fara neitt annað,“ sagði Rio Ferdinand, sem er dyggur stuðningsmaður síns gamla félags, Manchester United.
Ferdinand telur fullvíst að næsta skref Haaland á ferlinum verði tekið í Englandi, eina óvissan er í kringum það hjá hvaða liði hann tekur þau skref.
„Eini áfangastaður hans er England, það er eina landið sem hann mun fara til, ég yrði svo hissa ef hann færi einhvert annað.“
„Hann er fæddur hér og ólst upp hér. Hann elskar greinilega enska knattspyrnu og pabbi hans spilaði hér. Ég er viss um að það sé draumur hans að spila á Englandi og afhverju þá ekki hjá Manchester United?“
Það var líkt og Ferdinand væri að biðla til Haaland um að velja Manchester United.
„Afhverju ekki í rauðu treyjunni á Old Trafford? Vertu leikmaðurinn sem kemur aftur með titla til Manchester United,“ sagði Rio Ferdinand, fyrrverandi leikmaður Manchester United.
