Gary Neville sérfræðingur Sky Sports segir möguleika Manchester United á því að vinna ensku deildina í ár ekki mikla. United gerði markalust jafntefli við Liverpool í gær.
Manchester City er komið í bílastjórasætið en liðið er tveimur stigum á eftir toppliði United en á leik til góða.
„Ég held að möguleiki Manchester United á að vinna deildina sé lítill, Liverpool og Manchester City eru áfram tvö bestu lið deildarinnar,“ sagði Neville.
Hann segir möguleika United liggja í því að Paul Pogba spili frábærlega næstu þrjá mánuðina en franski miðjumaðurinn hefur verið góður síðustu vikur.
„Til að United eigi möguleika þarf Paul Pogba að spila frábærlega í tvo eða þrjá mánuði. Hann getur það. Hann er með sjálfstraustið núna, hann er með góðan hroka á þann veg að hann trúir á sjálfan sig.“
„Hann telur sig eiga að vera að spila í stærstu leikjum í heimi og vinna titla. Hann hugsar jákvætt og að hugsa eins og þú sért sá besti er hluti af því að vinna.“