Leopoldo Luque, læknir Maradona, heldur áfram að tjá sig við fjölmiðla. Leopoldo hefur stöðu grunaðs manns í rannsókn sem nú er farin af stað vegna andláts Diego Maradona. Rannsóknin á að skera úr um það hvort hægt hafi verið að koma í veg fyrir andlát Maradona.

Spænska blaðið Marca, greinir frá því að Leopoldo haldi því fram að Maradona hafi fengið bestu mögulegu læknisþjónustu og meira til á meðan hann lá á sjúkrahúsi.

„Á einum tímapunkt sagði Maradona við mig ‘ Hversu langt viltu fara með þetta læknir? Ég hef þjáðst mikið nú þegar’, sagði Leopoldo við fréttamenn í dag.

Hann telur að lífskrafturinn hafi verið horfinn úr Maradona.

„Ég held að Diego hafi, þegar upp er staðið, ákveðið að yfirgefa bardagann. Hann var mjög sorgmæddur og ég sá það. Hann var að refsa sjálfum sér á þá leið sem ég gat ekki samþykkt sem vinur hans,“ sagði Leopoldo.

Ástand Maradona hrakaði mjög eftir að hann yfirgaf sjúkrahúsið. Á endanum lést hann af völdum hjartaáfalls.

Rannsóknin á andláti Maradona er talin geta staðið yfir í nokkra mánuði. Í gær var gerð húsleit á heimili og vinnustað Leopoldo Luque.