Logi Ólafsson, fyrrum landsliðsþjálfari telur að Rúnar Kristinsson eigi að taka við íslenska landsliðinu. Þetta kom fram í Pepsi Max-mörkunum.

Erik Hamren hefur vegnað með ágætum í starfi eftir erfiða byrjun, verkefnin í október og nóvember skera úr um ágæti Hamren.

Rúnar varð Íslandsmeistari með KR í síðasta mánuði en þessi landsleikjahæsti leikmaður í sögu Íslands á að taka við landsliðinu, að mati Loga. Rúnar hafði verið orðaður við lið í Noregi, en er ekki á leið þangað. Logi vill hann til starfa í Laugardalnum.

„Breiddin og samkeppnin hefur skilað þeim þessu sem þeir hafa náð. Þekkjandi þessa menn og ef það á að fara með Rúnar eitthvað þá á að keyra hann niður í Laugardal og taka við landsliðinu. Það er mín skoðun,“ sagði Logi í þættinum.

„Þetta eru ekki stór orð heldur er þetta mín skoðun.“

Í huga Loga er Rúnar talsvert betri kostur en Hamren. „Ég er ekki í vafa um það en ég held að Rúnar myndi henta vel þar.“