Íslandsmeistarar KR hafa styrkt sínar raðir fyrir næsta tímabil en liðið hefur fengið Emil Ásmundsson til sín.
Emil hefur sterklega verið orðaður við KR undanfarna daga og staðfesti félagið skiptin í kvöld.
Emil er fæddur árið 1995 en hann kemur til KR frá Fylki þar sem hann hefur leikið undanfarin þrjú ár.
Emil á að baki 74 leiki fyrir Fylki í meistaraflokki og hefur í þeim skorað 13 mörk.
KR hefur nú tryggt sér hans þjónustu en hann lék átta leiki fyrir Fylki í sumar og skoraði eitt mark.
Meiðsli hafa sett strik í reikninginn hjá Emil sem var áður á mála hjá Brighton í Englandi.
