Breiðablik bauð upp á magnaða endurkomu í kvöld er liðið spilaði við FH í Pepsi Max-deild karla.

FH komst í 2-0 í leiknum í kvöld en Breiðablik svaraði fyrir sig með fjórum mörkum – þrjú af þeim komu í síðari hálfleik.

Lokastaðan 4-2 fyrir Blikum og hér má sjá það góða og slæma úr leiknum.

Plús:

Leikurinn var frábær skemmtun fyrir þá sem mættu á völlinn, sóknarbolti af bestu gerð. FH framan af leik og síðan tóku Blikar við.

Ekki skal dæma leik FH aðeins út frá úrslitum sínum, spilamennska liðsins í fyrri hálfleik var mögnuð. Það besta frá FH í langan tíma.

Endurkoma Blika var frábær, fengu vissulega hjálp með rauða spjaldinu frá Davíði Þór Viðarssyni. Þei gerðu hins vegar vel og því ber að hrósa.

Brynjólfur Darri er að stimpla sig hressilega inn í lið Blika, hann gefur liðinu öðruvísi spil til að spila á. Að auki virðist hann harðari í horn að taka en uppaldir Blikar eru, upp til hópa.

Mínus:

Bæði Gunnleifur Gunnleifsson og Daði í marki FH áttu vondan dag, Gunnleifur var í brasi framan af leik og Daði var óöruggur í þeim síðari.

Bakverðir beggja liða voru í veseni fyrir utan Alfons Sampsted sem var öflugur.

Davíð Þór Viðarsson fékk réttilegt rautt spjald miðað við sjónarhornið úr stúkunni, það reyndist FH mjög dýrkeypt.

Ólafur Kristjánsson, þjálfari FH hefur mætt Blikum í fjögur skipti frá því að hann kom aftur til landsins. Hans gamla félag hefur unnið alla fjóra leikina gegn FH, markatalan er 15-5.

Pepsi Max deildin á 433 er í boði