Aron Einar Gunnarsson, landsliðsfyrirliði, var gestur í hlaðvarpsþættinum Millivegurinn í gær.
Aron Einar er staddur hér á landi þessa stundina en hann tók þátt í landsliðsverkefni með Íslandi á dögunum.
Aron fór yfir athyglisvert mál í þættinum þar sem hann ræðir yngri leikmenn á borð við Albert Guðmundsson og Arnór Sigurðsson.
Þeir hlusta á eldri leikmenn landsliðsins og taka vel við gagnrýni. Aron viðurkennir þó að það komi fyrir að þeir fái nóg af því að hlusta á endalaus ráð frá öðrum strákum.
,,Þeir yngri taka ekki alveg nógu vel í hlutina en alls ekki hérna með landsliðinu eins og Albert og Arnór sem eru að koma inn í þetta,“ sagði Aron.
,,Þeir bera mikla virðingu fyrir eldri strákunum og hlusta en það kemur alveg fyrir að þeir eru svona ‘oh jesús, ætlar hann ekkert að hætta.’ Þeir samt vita það að við eldri drengirnir erum að reyna að hjálpa þeim.“
,,Þeir átta sig á því, við erum ekki bara að hrauna yfir þá til þess að hrauna yfir þá eða gera lítið úr þeim.“