Aga og úrskurðarnefnd KSÍ mun síðar í vikunni birta dóm sinn er varðar rasísk ummæli Björgvins Stefánssonar, framherja KR. Í gær var greint frá því að dómurinn myndi birtast i dag, því hefur verið frestað.

Björgvin, leikmaður KR í Pepsi Max-deild karla, lét ummælin falla í beinni útsendingu á Haukar TV fyrir tæpum tveimur vikum. Björgvin sá um að lýsa leik Hauka og Þróttar R. á Haukar TV en þau lið áttust við í Inkasso-deild karla.

Björgvin er fyrrum leikmaður Hauka en hann tjáði sig um Archange Nkumu, leikmann Þróttar. ,,Þetta er það sem ég er alltaf að segja, það er svo stutt í villimannseðlið hjá svarta manninum,“ sagði Björgvin.

Ekki eru allir sáttir með vinnubrögð aga og úrskurðarnefndar KSÍ og þar á meðal er Þórarinn Ásgeirsson, stjórnarmaður í knattspyrnudeild Hauka. Hann er einnig einn besti vinur Björgvins.

Aga og úrskurðarnefnd KSÍ fundaði í gær í annað sinn eftir að mál Björgvins kom upp, án þess að komast að niðurstöðu.

,,Hvaða andskotans grín er þessi aganefnd? Takið bara helvítis ákvörðun. Hvaða helvítis vinnubrögð er að láta þetta hanga yfir mönnum svo vikum skiptir. Búnir að skýla sér bak við eitthverja afsökun um að safna gögnum en hafa samt ekki óskað eftir neinu frá Haukum að minnsta kosti,“ skrifar Þórarinn, reiður.

Hvaða andskotans grín er þessi aganefnd? Takið bara helvítis ákvörðun. Hvaða helvítis vinnubrögð er að láta þetta hanga yfir mönnum svo vikum skiptir. Búnir að skýla sér bak við eitthverja afsökun um að safna gögnum en hafa samt ekki óskað eftir neinu frá Haukum að minnsta kosti

— Þórarinn Ásgeirsson (@ActionRed) June 5, 2019