Það fór fram stórleikur á Englandi í gær er lið Manchester United tók á móti Liverpool í ensku úrvalsdeildinni.

Fyrri hálfleikurinn í gær var ansi undarlegur en United þurfti að skipta þremur leikmönnum af velli vegna meiðsla. Liðinu tókst þó að enda leikinn með 11 menn á vellinum en Marcus Rashford var tæpur og var í erfiðleikum.

Því miður fyrir áhorfendur var ekki boðið upp á nein mörk í leik gærdagsins en færin voru af skornum skammti. Markalaust jafntefli því niðurstaðan í Manchester sem eru ekki frábær úrslit fyrir þessi lið.

Gary Neville fyrrum fyrirliði félagsins telur að Ole Gunnar Solskjær verði að fá starfið til framtíðar, hann hefur breytt miklu á stuttum tíma og stuðningsmenn félagsins elska hann.

Solskjær er með samning út þessa leiktíð en kemur til greina sem stjóri áfram. ,,Fyrir þremur mánuðum hefði verið öskrað á sóknarleik á Old Trafford ef það væri 0-0 á heimavelli,“ sagði Neville.

,,Það var sungið um Solskjær allan síðari hálfleikinn, andrúmsloftið hefur breyst svakalega.“

,,Hann hefur stuðningsmennina á sínu bandi, stjórnin getur í raun ekki gefið neinum öðrum starfið. Ég held að það verði læti ef það gerist.“

,,Hann er elskaður, það er stuðningur við liðið en Solskjær fær mestan stuðning.“