Jurgen Klopp, stjóri Liverpool var mættur á blaðamannafund í dag þar sem hann ræddi stórleikinn við Manchester City um helgina.

Liverpool seldi Philippe Coutinho til Barcelona í vikunni fyrir 145 milljónir punda sem gerir hann að þriðja dýrasta leikmanni heims.

Margir hafa sett spurningamerki við söluna á Coutinho en hann hefur verið yfirburðarmaður á Anfield, undanfarin ár.

„Ég vissi að þeir myndu koma með tilboð í hann í janúar og staðan hefði getað orðið ansi erfið ef við hefðum bannað honum að fara,“ sagði Klopp.

„Ef ég hefði sagt honum að hann væri samningsbundinn og neytt hann til þess að vera hérna áfram og hvað svo? Láta hann spila alla leikina eftir áramót, ósáttan?“

„Þetta var ákvörðun sem ég þurfti að taka. Get ég áfram notað hann og mun hann nýtast okkur? Ef ég á að vera hreinskilinn þá hafði ég ekki trú á því og þess vegna seldum við.“

„Hann stóð sig frábærlega fyrri hluta tímabilsins þrátt fyrir allt sem átti sér stað í sumar. Ég taldi mig ekki geta fengið það sama frá honum eftir þennan glugga.“

„Þetta er búið núna og það er kominn tími til þess að horfa fram á veginn,“ sagði Klopp að lokum.