Það eru margir sem baka fyrir jólin, þá helst smákökur sem renna ljúflega niður. Þeir sem vilja taka baksturinn snemma geta alltaf fryst kökurnar en það er ekki alveg sama hvernig það er gert.
Best er að byrja á því að leyfa smákökum að kólna alveg áður en þær eru frystar. Og þá meinum við alveg kólnaðar. Síðan er gott að taka sér plastílát í hönd og klæða það með ál- eða smjörpappír.
Þá er kökunum raðað í einfalda röð í boxið og álpappírs- eða smjörpappírsörk sett á milli laganna af kökum. Þegar að boxið er fullt er lokið sett á boxið og mikilvægt að passa að boxið sé vel lokað.
Þá er boxið sett í frystinn, en smákökur geta enst í allt að tvo mánuði í frystinum. Þegar að þú vilt njóta bakkelsisins er boxið tekið út og kökurnar látnar þiðna við stofuhita á grind eða á disk. Ekki afþýða þær í boxinu þar sem þær gætu orðið frekar linar og leiðinlegar. Eftir nokkra klukkutíma eru kökurnar til, en ef þú vilt velgja þær er hægt að setja þær á smjörpappírsklædda ofnplötu og hita þær í 10 mínútur við 135°C hita.