Opinn fundur um brotastarfsemi á íslenskum vinnumarkaði var haldin í dag á vegum Eflingar. María Lóa Friðjónsdóttir, sérfræðingur í vinnustaðaeftirliti hjá Alþýðusambandi Íslands hélt tölu á fundinum, þar sem kom meðal annars fram að starfsfólk væri hlunnfarið á margskonar hátt í ýmsum geirum, helst í ferðaþjónustu og mannvirkjagerð.
María tók ýmis dæmi, til dæmis að starfsmaður sem taldi sig vera að skrifa undir ráðningasamning var í raun að skrá sig sem stjórnarformann, en því hlutverki fylgir mikil ábyrgð. Þá hafði hún einnig dæmi um starfsmann sem var rukkaður af atvinnurekanda um hálfa milljón fyrir dvalar- og atvinnuleyfi og um mannafla á hestaleigum sem þarf að sofa í hesthúsum.
„Við höfum fréttir af sjálfboðaliðum og aðstaðan þeirra er að þau gista í hesthúsunum og það eru fleiri en eitt dæmi um þetta,“ sagði María Lóa í viðtali í kvöldfréttum RÚV. Þá nefndi hún annað alvarlegt dæmi um mann sem var ráðinn á hótel en rekinn nokkrum dögum síðar vegna litarhafts.
„Við fengum ábendingu um þetta núna í síðustu viku. Þar er ráðinn starfsmaður inn á veitingahús. Hann er að standa sig vel. Hann er reyndar ekki búinn að vera nema þrjá daga þegar að eigandinn kemur og viðkomandi starfsmaður er rekinn á staðnum. Ástæðan er að hann er svartur og eigandinn kærir sig ekki um að vera með svart fólk í vinnu,“ sagði María Lóa og bætti við:
„Þetta er staðfest dæmi. Það er til upptaka af þessu.“
María Lóa sagði einnig í viðtali RÚV að hún hefði óstaðfest dæmi um að hóteleigandi hefði hvatt starfsfólk sitt til vændis.
„Þetta er frekar svakalegt en við höfum frásögn af því að hóteleigandi hafi ekki gefið grænt ljós, en sagst horfa í hina áttina. Að fólki væri alveg heimilt að selja sjálft sig til að auka tekjurnar. Þetta þarf að skoða betur.“
Þá bætti hún við að það væri í skoðun að birta svartan lista yfir þá aðila sem fremja ítrekað slík brot þegar að öll gögn liggja fyrir hendi.
„Mér finnst engin ástæða til að hlífa þeim sem að stunda slíka glæpastarfsemi á Íslandi.“
