Eiður Smári Guðjohnsen og Arnar Þór Viðarsson hafa verið ráðnir sem nýr þjálfarar íslenska U21 landsliðsins.

Þetta staðfesti KSÍ á blaðamannafundi í dag en tvímenningarnir taka við af Eyjólfi Sverrissyni og gera tveggja ára samning.

Eyjólfur var lengi þjálfari U21 landsliðsins en hann tók við árið 2009 og var því við stjórnvölin í tæp tíu ár.

Eið Smára og Arnar ættu allir að þekkja en Eiður er talinn einn allra besti leikmaður í sögu Íslands.

Hann hefur undanfarna mánuði verið að mennta sig í þjálfun og fær nú gullið tækifæri hjá KSÍ.

Eiður lagði skóna á hilluna fyrir um tveimur árum síðan en á að baki leiki fyrir fjölda stórliða í Evrópu.

Hann lék með liðum á borð við Chelsea, Barcelona, Tottenham og Monaco og er reynslan því gríðarleg.

Arnar er eins og Eiður fyrrum landsliðsmaður en hann lék 52 landsleiki frá 1998 til 2007.

Hann hefur undanfarin ár verið búsettur í Belgíu og starfað hjá Lokeren sem aðstoðarþjálfari.

Arnar er nú á heimleið en hann og Eiður störfuðu einnig saman hjá belgíska liðinu Cercle Brugge árið 2014.