„Þetta verður mjög erfiður leikur. Þeir verjast vel sem lið, með tvær þéttar varnarlínur. Það verður erfitt að komast í gegnum miðjuna og við þurfum að nota kantana,“ segir Willy Caballero, markvörður argentínska landsliðsins í knattspyrnu.
Í umfjöllun AP-fréttastofunnar um leik Íslands og Argentínu á laugardag er bent á þá staðreynd að íslenska liðið sé mun hærra en það argentínska. Meðalhæð íslensku strákanna er 185 sentímetrar en á sama tíma er argentínska liðið eitt það lágvaxnasta, eða 179 sentímetrar að meðaltali.
„Þetta er vopn sem Ísland mun reyna að nota til að svara einstaklingsgæðum Lionel Messi og annarra leikmanna þegar liðin mætast í D-riðli á laugardag,“ segir í umfjöllun AP.
Bent er á það að Argentínumenn hafi æft föst leikatriði nokkuð stíft undanfarna daga á æfingasvæðinu í Bronnitsy. Jorge Sampaoli, þjálfari Argentínu, er sagður hafa látið lægstu leikmenn liðsins æfa svæðisvörn en hærri leikmenn liðsins, Nicolas Otamendi, Marcos Rojo, Maximiliano Meza, Lucas Biglia og Angel Di Maria voru látnir dekka andstæðing sinn.
„Í þessari viku höfum við æft hluti eins og föst leikatriði,“ segir Nahuel Guzman, annar markvörður argentínska liðsins. Hann bætir við að hann sé sannfærður um að æfingar argentínska liðsins hafi og muni skila árangri.
Guzman segir við AP að argentínska liðið þurfi að sýna þolinmæði, hreyfa boltann vel til að búa til svæði og keyra upp hraðann í leiknum með stuttu spili og fáum snertingum. „Þetta verður mikil vinna,“ segir hann.
Margir telja að Argentína eigi auðvelt verkefni fyrir höndum en ef litið er til árangurs Íslands í stórleikjum þá virðist argentínska liðið meðvitað um gæði íslenska liðsins. Willy Caballero er það að minnsta kosti. „Þetta er fyrsti leikur heimsmeistaramótsins. Það er alltaf erfitt að byrja.“