Farþegi með Ryanair flugfélaginu hneykslaði samferðamenn sína með því að fela sig í farangurshólfinu fyrir ofan farþegarýmið á meðan flugi stóð frá Möltu til Napólí á Ítalíu.

Myndband af athæfinu fer nú um samfélagsmiðla þar sem sjá má manninn grínast með að hann hafi falið sig til að sleppa við að greiða fyrir flugið.

„Hvernig á að sleppa því að borga fyrir farmiðann til baka til Napólí. En þeir náðu mér …“ skrifaði maðurinn í myndatexta við myndbandið á TikTok.

Þar sést maðurinn sem er smávaxinn slappa af í farangurshólfinu og öskra „Napoli“ (gælunafn ítölsku borgarinnar) af öllum krafti á meðan áhorfendur hlæja og fagna.

@gaetanino97 Come non pagare il biglietto di ritorno per Napoli. Ma mi hanno scoperto… #risposta #malta #gaetanino ♬ audio originale – gaetanino

Í myndskeiði sem fylgdi í kjölfarið sést maðurinn fá skapofsaköst á flugvellinum eftir að hafa virst hafa misst af fluginu. Þar öskrar hann yfir flugstöðina og ýtir jafnvel við stólpa.

„Strákar, við misstum af fluginu!!!!!“ stóð í myndatexta.

Maðurinn birtir reglulega myndbönd af sér þar sem hann framkvæmir hin ýmsu asnasköft opinberlega, eins og að berja hátt í píanó í verslunarmiðstöð og hlaupa um flugvöll á meðan hann öskrar hástöfum.

Mörgum fannst flugatriði hans þó ekkert fyndið. Einn sagði að setja ætti manninn á bannlista hjá flugfélaginu. Annar sagðist vonast til að yfirvöld „hefðu tekið eftir atvikinu og gripið til aðgerða“.
Einn benti réttilega á að þessi brella væri ekki einu sinni skynsamleg þar sem maðurinn hefði þurft miða til að fara um borð í fyrsta lagi. Og það hefði í raun getað verið dýrara fyrir hann að ferðast í farangurshólfinu, þar sem Ryanair er alræmt fyrir að rukka farþega aukalega fyrir að geyma farangur sinn þar.