Veturinn lætur bílana okkar finna fyrir því og margir ökumenn lenda í því að rúðuþurrkurnar byrja að skilja rendur eftir sig á framrúðunni. Margir telja að þá sé kominn tími til að skipta um þurrkublöð en í mörgum tilfellum þarf þess ekki því það er til einfaldari og ódýrari lausn.

Rendur koma yfirleitt á framrúðuna þegar þurrkublöðin þrífa glerið ekki lengur jafnt. Á veturna er ástæðan fyrir því oft að drulla, salt og leifar af rúðuvökva safnast saman og setjast í æðar gúmmísins.

Margar tegundir rúðuvökva innihalda glýserín en það sér til þess að gúmmíið sé slétt í kuldanum. Með tímanum getur glýserínið þó oft skilið eftir sig fituskán sem dregur úr gæðum þurrkublaðanna og þar með verður útsýnið úr bílnum verra.

Vezess skýrir frá þessu og segir að bifvélarvirkjar mæli með að fólk reyni að þrífa þurrkublöðin vel áður en rokið er til og ný keypt.

Eldhúspappír eða fibertuska, sem eru vætt með glerhreinsi eða mildu hreingerningarefni, getur dugað til.

Brúnir gúmmísins eru þurrkaðar vel og vandlega eða þar til skítur og annað er farið af. Um leið ætti að þrífa framrúðuna með höndunum því drulla getur setið í litlum sprungum í henni og valdið því að rendur myndast.