Daily Star segir að Cobby hafi verið nauðgað og síðan skorin á háls og það svo hrottalega að höfuð hennar hafi nær verið fallið af búknum. Áður en hún var skorin á háls gekk hún í gegnum tveggja klukkustunda „niðurlægingu og ofbeldi“ að því er saksóknari málsins sagði fyrir dómi 1987.
Bræðurnir Michael Murphy, 33 ára, Gary Murphy, 28 ára, og Leslie Murphy, 23 ára, voru fundnir sekir um morðið ásamt John Travers og Michael Murdoch, sem voru báðir 18 ára. Þeir rændu Cobby þegar hún var á leið heim þann 2. febrúar 1986.
Nágranni heyrði Cobby öskra þegar fimmmenningarnir námu hana á brott. Hann gerði öðrum nágranna viðvart og sá fór að leita að henni en fimmmenningarnir földu sig í háu grasi og einnig Cobby. Þeir sáu nágrannann síðan aka á brott.
Þeir óku síðan á brott með Cobby. Á leiðinni kýldu þeir hana margoft og nefbrotnaði hún og kjálkabrotnaði. Henni var einnig nauðgað.
Að þessu loknu drógu mennirnir hana inn í hestagirðingu við Reen Road í Prospect og héldu áfram að misþyrma henni og nauðga.
Áhyggjur komu upp meðal fimmmenninganna um að Cobby, sem þeir höfðu afklætt, hefði séð andlit þeirra og vissi nöfn þeirra og var Travers því hvattur til að drepa hana. Hann skar hana þá á háls og var skurðurinn svo djúpur að höfðið datt næstum af. Því næst hengdu þeir lík hennar á gaddavírsgirðingu áður en þeir yfirgáfu vettvanginn.
Lögreglan handtók þá alla en nokkrir dagar liðu þar til tekist hafði að ná þeim öllum því sumir lögðu á flótta.
Gary Murphy meig á sig af hræðslu þegar hann var handtekinn en þá var hann í felum með Michael bróður sínum.
Við yfirheyrslu sögðu mennirnir, að Travers undanskildum, að Travers væri „klikkaður“ og hefði stært sig af að hafa misnotað dýr kynferðislega áður en hann skar þau á háls. Fimmmenningarnir áttu allir sakarferil að baki og voru þekktir „smákrimmar.“
Lík Cobby fannst 4. febrúar eftir að bóndi tók eftir því að kýrnar hans hegðuðu sér undarlega. Krufning leiddi í ljós að hún var með þrjá stóra áverka á hálsi og þrjá minni. Talið er að hún hafi látist fljótlega eftir að hún var skorin á háls.
Hún var einnig með svöðusár á brjóstum, fótum, mjöðm, höndum og fingrum og áverkar voru víðs vegar um líkamann og á höfði hennar.
Cobby bjó hjá foreldrum sínum en hún var skilin við eiginmann sinn, John Cobby.
Hún fór út að borða með vinum sínum þegar hún hafði lokið vakt á sjúkrahúsi í Sydney. Hún tók síðan lest heim til Blacktown stöðvarinnar þar sem hún var vön að hringja í föður sinn og fá hann til að sækja sig. En síminn á lestarstöðinni var bilaður og enginn leigubíll við stöðina. Hún ákvað því að ganga heim og varð þá á vegi fimmmenninganna.
Þeir voru allir fundnir sekir um nauðgun og morð og dæmdir í ævilangt fangelsi án möguleika á reynslulausn. Michael Murphy lést af völdum krabbameins 66 ára að aldri en hinir hrottarnir eru í fangelsum í New South Wales og verða þar það sem þeir eiga eftir ólifað.
