Þegar Bretinn Spencer Richard stendur í eldhúsinu, þá eru það ekki Michelin-stjörnur sem hann dreymir um. Hann vinnur þess í stað með svolítið sem er miklu stærra en Michelin-stjörnur í hans huga – að hjálpa dvalargestunum á líknardeildinni með að fá góðar máltíðir á síðustu dögum lífsins.

Hann starfar á líknardeildinni Sobell House í Oxfordskíri og maturinn hans er oft síðasta máltíðin sem fólk borðar og hann tekur þetta mjög alvarlega og finnst mikil ábyrgð hvíla á herðum sínum.

Þetta sagði hann í samtali við Mirror.

„Ég held ekki að það sé neinn stærri heiður fyrir kokk en að elda síðustu máltíðina fyrir einhvern,“ sagði hann.

En hvað vill fólk borða þegar kemur að hinstu máltíðinni? Það er sjaldnast einhver rosalega fínn matur. Oft velur fólk eitthvað sem vekur upp ákveðnar minningar. Eitthvað einfalt.

Spencer nefndi til dæmis 21 árs mann sem neitaði alfarið að borða á líknardeildinni þar til Spencer komst að því að hann elskaði skyndibitafæði. Eftir það eldaði hann bara hamborgara og taco fyrir hann og ungi maðurinn tók gleði sína á nýjan leik.

Stundum getur einföld máltíð verið plástur á margra áratuga gömul sár. 93 ára kona, sem hafði ekki haldið upp á afmælið sitt í 80 ár, fékk köku með kertum á. „Hún sagði að þetta væri besti dagur lífs hennar,“ sagði Spencer.

En það er ekki alltaf auðvelt að elda fyrir dauðvona fólk því þegar sjúkdómurinn sækir í sig veðrið, breytast bragðlaukarnir. Salt virðist sterkara og matarlystin getur horfið.

Af þeim sökum breytir Spencer réttunum, notar ekki salt og notar jurtir til að ná rétta jafnvæginu. Eitt er það þó sem flestir vilja fá: „Köku. Fólk vill gjarnar fá smá kökubita sem síðustu máltíðina,“ sagði hann.