Hópur vísindamanna sem dvelur á Sanae IV-rannsóknarstöðinni getur væntanlega vitnað um það en hópurinn hefur sent beiðni þess efnis að einhver komi og sæki þá eftir að kollegi þeirra gekk af göflunum.
Sunday Times í Suður-Afríku greindi frá málinu um helgina.
Um er að ræða tíu manna hóp vísindamanna frá Suður-Afríku og mun einn úr hópnum hafa sent tölvupóst í síðustu viku sem vakti nokkrar áhyggjur.
Kom fram að farið væri að bera á geðrænum veikindum eins úr hópnum sem ráðist hefði á samstarfsmenn sína og hótað að drepa þá. Þá var hann sakaður um að hafa brotið kynferðislega gegn einum úr hópnum.
Hópnum er nokkur vandi á höndum því samkvæmt áætlun ætti hann að dvelja á Suðurskautslandinu í tíu mánuði til viðbótar.
Í tölvupósti sem Sunday Times vitnar segir meðal annars:
„Því miður er hegðun hans orðin óútreiknanleg. Hann réðst á (X) sem er alvarlegt brot á öryggismálum vinnustaðarins og hann hótaði að drepa (X) sem hefur skapað óttablandið andrúmsloft. Ég er farinn að óttast um eigið öryggi og hugsa stöðugt um það hvort ég verði næsta fórnarlambið.“
Dion George, ráðherra umhverfismála, segir við Sunday Times að málið sé tekið alvarlega og hann muni persónulega ræða við hópinn. Engin ákvörðun hefur þó verið tekin um það hvort hópurinn fari heim eða hvort einstaklingnum sem verið hefur til vandræða verði snúið heim.
