Þetta sagði Bezos á tækniráðstefnu sem haldin var í Tórínó á Ítalíu fyrr í þessum mánuði.
Fortune segir frá þessu og vísar í orð Bezos þess efnis að háþróuð tækni – sérstaklega á sviði gervigreindar – muni ekki aðeins gera líf okkar á jörðinni einfaldara heldur einnig ýta undir landnám í geimnum.
Bezos segir að fólk muni ekki flytjast út í geim af nauðsyn, til dæmis til að sinna þar störfum.
„Við þurfum ekki fólk til að búa í geimnum. Ef þörf er á að gera eitthvað á yfirborði tunglsins eða annars staðar getum við sent vélmenni til að sinna þeirri vinnu – það verður miklu hagkvæmara en að senda menn,” sagði hann.
Hann spáði einnig að stór gagnaver muni flytjast út í geim á næstu 10 til 20 árum.
„Við munum byrja að byggja þessi risastóru gagnaver í geimnum, sem nota gríðarlega mikið af orku,“ sagði hann og vísaði í þá staðreynd að þar sé hægt að nota sólarorkuna allan sólarhringinn.
Bezos segir að fólk hafi ríka ástæðu til að bíða spennt eftir framtíðinni og hann hvetur fólk til að líta gervigreind jákvæðum augum.
Hann telur að ávinningurinn fyrir samfélagið af gervigreind verði gífurlegur, þó hann viðurkenni að nú ríki ákveðin „iðnaðarbóla“.
Fjárfestar gætu átt erfitt með að „greina á milli góðra hugmynda og slæmra“, en Bezos bendir á að í slíkum bólum hafi sagan sýnt að „þegar rykið sest og sigurvegararnir koma í ljós, njóti samfélagið á endanum góðs af þeim uppfinningum.“
