Fyrrum aðstoðarmaður meinta raðmorðingjans Rex Heuermann segir hann skulda sér tæpar 3 milljónir. Hún hafi fengið illar bifur af honum strax þegar hún störf en þó aldrei grunað að hann yrði sakaður um hrottaleg morð. Tæpu ári eftir handtöku fyrrum yfirmannsins er hún enn að komast yfir áfallið. 

Donna Sturman varð ráðin inn sem aðstoðarmaður á arkitektastofu Heuermann á Manhattan árið 2017. Hún segir nú í viðtali við WABC-TV að henni hafi frá öndverðu þótt óþægilegt að vinna fyrir meinta raðmorðingjann. Hún hafi þó tekið starfinu þar sem hún hafði ekki um annað að velja.

„Hann bauð mér svo mikinn pening, og eins og ég segi, þá var ég staurblönk, svo ég þáði vinnuna.“

Efndir á þessu loforði voru þó ekki eftir væntingum en Sturman fékk hvorki greitt fyrir yfirvinnu eða fyrir orlof. Vinnumálastofnun New York komst að þeirri niðurstöðu árið 2021 að Heuermann skuldaði aðstoðarmanni sínum tæpar 3 milljónir, en þó gengið væri eftir arkitektinum þá greiddi hann ekki krónu. Málið fór því í úrskurð sem féll í september Sturman í vil.

„Nei hann hefur ekki borgað mér. Hann er klárlega ekki í fangelsinu núna að skrifa út ávísanir.“

Eitt helsta sönnunargagnið sem tengir Heuermann við morðin er erfðaefni sem lögregla fann á kassa utan af pitsu í ruslatunnu við heimili Heuermann. Sturman segist oft hafa keypt pitsu sem þessa fyrir yfirmann sinn.

„Ég keypti þessar pitsur fyrir hann. Það truflaði mig alltaf að hann borðaði aldrei skorpuna“

Sturman segir að þó tæpt ár sé liðið frá því að Heuermann var handtekinn þá hafi hún ekki enn komist yfir áfallið. „Þetta er bara skelfilegt áfall, maður varla trúir þessu“

Þó henni hafi ekki liðið sérstaklega vel í starfi þá hafi ekki hvarflað að henni að Heuermann væri fær um að myrða fjórar konur og losa sig við líkamsleifar þeirra með vanvirðandi hætti.

„Hann virtist alltaf svo tillitssamur.“