Umsátursástand skapaðist þegar byssumaður að nafni Man Haron Monis ruddist þar inn og hélt tíu gestum og átta starfsmönnum föngnum í samtals 16 klukkustundir. Monis þessi hafði komið sem flóttamaður frá Íran árið 1996 og var hallur undir málstað ISIS.
Umsátrið endaði með því að Monis myrti tvo gísla áður en lögregla skaut hann til bana. En hingað til hefur það ekki verið opinberað hver það var sem veitti Monis banaskotið og var hann alltaf kallaður Lögreglumaður A. Í dag breyttist það hins vegar.
Dómstóll hefur nú fallist á beiðni hans um að fá að segja sögu sína og það sem fyrir augu bar á kaffihúsinu þennan örlagaríka dag. Hann mun ræða þetta ítarlega í þættinum Spotlight sem sýndur verður á Channel 7 í Ástralíu á sunnudagskvöld.
„Ég hef aldrei verið týpan sem bakkar út úr slagsmálum og í mjög langan tíma hef ég barist fyrir því að fá nafnið mitt aftur,“ segir hann en ákvörðunin um að nafni hans skyldi halda leyndu var tekin til að tryggja öryggi hans.
Þetta reyndist Ben Besant erfitt og segist hann hafa þróað með sér áfallastreituröskun og þá hafi hjónabandið hans farið í vaskinn. Hann segir að þessi árstími, jólin og aðdragandi þeirra, hafi verið mjög erfiður fyrir hann síðustu ár en ber þá von í brjósti að það muni breytast nú þegar hann getur sagt sögu sína.
