Fyrir 14 árum var úrskurðað að Helen Bird, þriggja barna móðir, hefði tekið eigið líf en hún fannst látin í bílskúrnum við heimili hennar í Blackmans Bay í Tasmaníu í Ástralíu. Það var eiginmaður hennar sem kom að henni látinni.

En í nýjum úrskurði dánardómsstjórans Robert Webster kemur fram að eiginmaður Helen, Mark, hafi notað eiturgufur til að gera hana „ósjálfbjarga“ áður en hann setti sjálfsvíg hennar á svið. Hann hafi síðan logið að lögreglunni og hafi í framhaldinu hellt sér yfir lögregluna og sakað hana um „ófullnægjandi“ rannsókn á andláti Helen, sem var hjúkrunarfræðingur.

Mirror skýrir frá þessu og segir að Mark hafi notað eiturgufur til að kæfa Helen. Síðan hafi hann komið síma hennar, ljósmynd og bréfi fyrir á bekk í bílskúrnum til að láta líta út fyrir að hún hefði tekið eigið líf.

Í úrskurði dánardómsstjórans segir að engar sannanir hafi fundist fyrir að Helen hafi minnst á eða hótað að taka eigið líf. Það hafi því ekki verið nein ástæða fyrir hana til að gera tilraunir með kaðla eða aðrar aðferðir til að taka eigið líf.

Dánardómsstjórinn vandar Mark ekki kveðjurnar og segir hann „ótrúverðugan“. Hann hafi verið ófær um að hugsa almennilega um sjálfan sig og hvað þá börn þeirra hjóna en þau voru það sem líf Helen snerist um.

ABC Australia segir að Mark hafni þessum ásökunum algjörlega. Hann hefur haldið því fram að Helen hafi drukkið mikið áfengi kvöldið áður en hún lést. Hann er sagður hafa átt í ástarsambandi við aðra konu þegar Helen lést.

Ef ein­stak­ling­ar glíma við sjálfs­vígs­hugs­an­ir er bent á Hjálp­arsíma Rauða kross­ins 1717 og netspjall Rauða krossins 1717.is. Opið allan sólarhringinn. Einnig má hafa sam­band við Píeta-sam­tök­in sem veita ókeyp­is ráðgjöf í síma 552-2218, allan sólarhringinn. Netspjall Heilsuveru þar sem svarar hjúkrunarfræðingur er líka opið frá kl.8-22 alla daga. Fyrir þau sem misst hafa ástvin í sjálfsvígi má fá stuðning í sorg hjá Sorgarmiðstöð og hjá Pieta samtökunum.