Þann 9. júní 1995 fór Morgan Nick sex ára gömul á hafnaboltaleik með Colleen móður sinni í Alma í Arkansas. Á meðan á leiknum stóð fór Morgan ásamt tveimur vinkonum sínum að veiða eldflugur. Vinkonurnar sneru til baka án Morgan.
Í frétt Associated Press árið 1995 var greint frá því að vinkonur Morgan hafi síðast séð til hennar þar sem hún stóð nálægt bíl og var að losa sand úr skónum sínum. Um svipað leyti sást rauður pallbíll á ferð sem skeggjaður maður keyrði. AP greindi frá því að hvarf Morgan og ferðir vörubílsins hafi átt sér stað um svipað leyti.
„Ég fór að bílnum okkar, leit í kringum hann að utan, opnaði hurðirnar, leit inn í bílinn og hélt að hún væri komin inn,“ sagði Colleen við Unsolved Mysteries. „Jafnvel á einum tímapunkti leit ég undir bílinn og hugsaði bara að hún yrði að vera hérna einhvers staðar. Innan nokkurra mínútna var allt fólkið og flestir bílarnir horfnir og það var mjög ljóst að Morgan var ekki þarna.“
Hvarf Morgan vakti mikla athygli í Arkansas og þúsundir vísbendinga skiluðu sér til lögreglunnar. En eftir nokkur ár kólnaði málið og var óleyst.
„Þetta er það versta sem nokkurt foreldri getur lent í,“ sagði Colleen. „Það er þessi tilfinning að þetta sé ekki raunverulegt, einhvern veginn. Það virðist ekki mögulegt að barnið þitt sé horfið, að einhver gæti hafa tekið barnið þitt.“
Eftir tæpa þrjá áratugi tilkynnti lögreglan loksins að alvöru vísbending hefði fundist í málinu. Þann 1. október 2024 tilkynnti lögreglan í Alma á blaðamannafundi að DNA sýni hefði leitt lögregluna á slóð manns, sem lést árið 2000.
Billy Jack Lincks var yfirheyrður tveimur mánuðum eftir hvarf Morgan. Á þeim tíma var hann einnig til rannsóknar í öðru máli þar sem tilraun var gerð til að ræna öðru stúlkubarni nokkrum vikum eftir hvarf Morgan. Lincks var dæmdur fyrir kynferðislega áreitni gegn barni árið 1996.
Málið um hvarf Morgan var endurupptekið árið 2020. Fréttastofur greindu frá því að lögreglan hefði leitað í vörubíl sem hafði tilheyrt Lincks, eftir að hafa fundið nýjan eiganda bílsins. Leitin bar árangur.
Vörubíllinn innihélt nokkur hár sem voru send á rannsóknarstofu til greiningar. Rannsakendur komust að því að hárin tilheyrðu fjölskyldumeðlimi Morgan, kannski jafnvel Morgan sjálfri. Engar sannanir voru fyrir því að einhver annar úr fjölskyldu stúlkunnar hefði verið inni í bílnum. Niðurstöðurnar leiddu til þess að lögreglan tilkynnti að hún væri opinberlega að lýsa Lincks grunaðan um hvarf Morgan.
„Her stuðningsmanna, talsmanna og hetja hefur safnast saman til að afhjúpa sannleikann um hvarf hennar,“ sagði Colleen á blaðamannafundi. „Hjarta Morgans skín áfram.“
