Nokkurt uppnám varð um síðustu helgi á útskriftarathöfn Ohio State háskólans í Bandaríkjunum en athöfnin fór fram á leikvangi skólans, sem er í borginni Columbus í Ohio-ríki. Kona sem átti dóttur sem var meðal þeirra nemenda sem voru að útskrifast lést eftir hátt fall úr áhorfendastúku á leikvanginum.

NBC greinir frá en konan var 53 ára gömul. Hún var úrskurðuð látin á vettvangi en hún fannst rétt fyrir utan leikvanginn en grunur leikur á að hún hafi tekið eigið líf með því að stökkva. Konan féll úr alls 41 metra hæð en lögreglan segir ekkert benda til að nokkurt saknæmt hafi átt sér stað og ekkert bendi heldur til þess að um slys hafi verið að ræða.

Athöfnin var í þann mund að hefjast þegar atvikið átti sér stað og hélt áfram eins og ekkert hefði í skorist. Sumum nemenda og gesta á athöfninni var þó bersýnilega brugðið. Talmaður háskólans segir að öllum starfsmönnum skólans sem voru viðstaddir athöfnina og öllum nemendum sem voru að útskrifast hafi verið boðin sálfræðiaðstoð.