Hneykslismál skekur nú Svíþjóð en það varðar karlkyns leikfimiskennara sem sakaður er um að hafa tekið með leynd ljósmyndir af nöktum eða fáklæddum stúlkum í skóla þar sem hann starfaði. Eru stúlkurnar sagðar vera yfir 100 talsins. Maðurinn var hins vegar ráðinn til starfa þrátt fyrir að hafa áður verið sakaður um sams konar háttsemi í öðrum skólum þar sem hann starfaði.
Sænska ríkissjónvarpið SVT greinir frá málinu í fjölda frétta.
Þar kemur fram að skólinn sem maðurinn starfaði síðast við er í miðhluta Svíþjóðar.
Háttsemi hans komst upp sumarið 2022 en þá var hópur barna í sundi. Hópur starfsmanna skólans tók þá þá eftir því að samstarfsmaður þeirra, leikfimiskennarinn, virtist vera í laumi að taka myndir af stúlkum skipta um föt. Tekin var mynd af manninum og skólastjóranum var tilkynnt um hegðun hans. Skólastjórinn hafði þegar samband við lögregluna. Daginn eftir framkvæmdi lögreglan húsleit á heimili mannsins og fann fjölda mynda á hörðum diskum af nöktum eða fáklæddum stúlkum. Sumar þeirra voru nafngreindar.
Fréttamenn SVT hafa komist að því að fyrst var kvartað undan manninum fyrir 10 árum.
Árið 2014 starfaði hann í skóla í sveitarfélaginu Haninge sem er úthverfi Stokkhólms. Mörgum nemenda þótti maðurinn óviðurkvæmilegur og honum var stranglega bannað að fara inn í búningsklefa stúlkna, jafnvel þótt kviknað væri í búningsklefanum.
Maðurinn hlýddi hins vegar ekki og var þá fluttur í annan skóla í sveitarfélaginu.
Í þeim skóla var hann staðinn að verki við að taka myndir innan undir íþróttafötum stúlku sem hann var að aðstoða við fimleikaæfingu.
Tilkynnt var um athæfi mannsins til yfirmanns fræðslumála í sveitarfélaginu sem segist hafa haft samband við lögreglu vegna málsins en engin kæra var þó lögð fram á hendur manninum. Í staðinn gerði sveitarfélagið starfslokasamning við hann árið 2016 og greiddi honum hálfa milljón sænskra króna (6,4 milljónir íslenskra króna).
Þrátt fyrir allt þetta tókst manninum að fá starf sem leikfimiskennari í umræddum skóla í miðhluta Svíþjóðar árið 2018 en hluti af verkefnum hans var baðvarsla. Þar starfaði hann í fjögur ár áður en athæfi hans komst upp og var loksins tilkynnt til lögreglu.
Hvernig stóð á því að karlmaður var látinn vera baðvörður í búningsklefa stúlkna kemur hins vegar ekki fram í netfréttum SVT.
Börn og kennarar í þó nokkrum skólum höfðu áður varað við manninum. Skólastjórinn í skólanum þar sem hann starfaði síðast segir í samtali við SVT ekkert hafa vitað um eldri ásakanir á hendur manninum áður en hann var ráðinn.
Skólastjórinn fullyrðir að maðurinn hafi verið vinsæll meðal bæði nemenda og kennara skólans. SVT segir að maðurinn hafi viðurkennt að hafa tekið myndirnar en vilji meina að hann hafi ekki gerst sekur um glæp.
Skólastjórinn segir að áður en maðurinn hafi verið ráðinn hafi hann vísað á aðila sem tilbúnir væru til að veita honum meðmæli. Haft hafi verið samband við þessa aðila í ráðningarferlinu. Skólastjórinn neitar hins vegar að upplýsa hvaða aðilar þetta voru.
