Smábærinn Gower í Missouri-fylki í Bandaríkjunum er skyndilega orðinn vettvangur fjölmargra pílgríma eftir að lík kaþólskrar nunnu, sem lést fyrir fjórum árum, var grafið upp og í ljós kom að líkami hennar hafði ekkert látið á sjá.

Systir Wilhelmina Lancaster var vel metin í bænum en hún lést árið 2019, þá 95 ára gömul. Kista hennar var grafin tímabundið í kirkjugarði fyrir utan kapellu reglunnar sem hún þjónaði en á dögunum var kistan grafin upp til að koma henni fyrir í grafhvelfingu undir kapellunni sjálfri.

Þá kom í ljós að líkami Lancaster hafði ekkert látið á sjá og umsvifalaust fóru þessar ótrúlegu fregnir að berast víða. Fjölmiðlar fóru að tala um Krafaverkið í Missouri (e. Miracle in Missouri) og nú er svo komið að hundruðir gesta hafa lagt leið sína til kapellunnar í Gower, sem er skammt frá Kansas-borg, til þess að sjá líkama Lancaster með berum augum.

„Okkur var sagt að búast bara við beinum enda hafði líkami systur Wilhelmínu ekki undirgengist smurningu og hún var grafin í einfaldri viðarkistu,“ hefur Newsweek eftir ónefndri nunnu sem tilheyrir reglunni.

Í gegnum rifu á kistunni hafi þó sést að líkami Lancaster hafi virst vera í mjög heillegu ástandi. Abbadísin Cecilia Snell tók þá að sér að kanna málið nánar, vopnuð vasaljósi, og þegar hún greindi öðrum systrum frá ástandi líks þá fögnuðu þær ákaft.

„Ég meina, það var eins og drottinn væri að verki,“ er haft eftir abbadísinni.

Hins vegar hafi húðin á líkinu virst afar viðkvæm og því hafi andlit og hendur hennar verið vaxaðar áður en líkið var opinberað til sýnis fyrir gesti og gangandi.

Í annálum kaþólsku kirkjunnar eru til fjölmargar sagnir af líkömum látinna sem ekki verða fyrir náttúrulegri rotnun og þykir það bera vott um heilagleika viðkomandi. Það skýrir áhuga kaþólskra pílgríma sem hafa flykkst að kapellunni í Gower til að sjá kraftaverkið með eigin augum.

Biskup umdæmisins, James Johnston, gaf út yfirlýsingu í kjölfarið og sagðist vel skilja áhuga fólks en boðaði að kraftaverkið yrði rannsakað ítarlega á næstu dögum.